Sonnet XXII

Luiſant Soleil, que tu es bien heureus,
De voir touſiours de t’Amie la face :
Et toy, ſa ſeur, qu’Endimion embraſſe.
Tant te repais de miel amoureus.

Mars voit Venus : Mercure auentureus
De Ciel en Ciel, de lieu en lieu ſe glaſſe :
Et Iupiter remarque en mainte place
Ses premiers ans plus gays & chaleureus.
Voilà du Ciel la puiſſante harmonie,
Qui les eſprits diuins enſemble lie :
Mais s’ils auoient ce qu’ils ayment lointein.
Leur harmonie & ordre irreuocable
Se tournerait en erreur variable,
Et comme moy trauailleroient en vain.