Brúnu augun þín

Við enda gangsins er ljós
Sem enginn virðist sjá
Í vasa við lyftuna er rós
Og sófi sem tekur þrjá
Og fólkið kemur og fer
Og ég veit ástin mín
Hvers ég sakna í heimi hér
Brúnu augun þín

Þjónninn með sitt þreytta fas
Á þeytingi milli borða
Fólk gleypir kjöt eða gras
Öll samskipti eru án orða
Og það er komið að mér
Fylla glösin fín
Og þau kalla á mig líka hér
Brúnu augun þín

Kvöldið kyrrlátt og heitt
Stórborgarysinn hann rís
Klukkan er korter í eitt
Og það er kallað taxi, plís
Ljósin lýsa svo skær
Menn hlæja og gera grín
En ég þrái bara að vera þér nær
Horfa í brúnu augun þín