今日死真D (Gam1 Jat6 Sei2 Zan1 D) (III) (Live at MacPherson Stadium 2016)

[游學修「今日死真D (III) (Live)」的歌詞]

[讀白: 游學修]
有冇見過主持節目嘅時候可以食煙吖？亞洲電視就有啦。*觀眾笑聲* *點煙* Red Diffusion，知唔知係咩啊？Red Diffusion就係麗的呼聲嘅英文名，即係「broadcasting again」嘅意思。啫係咩啊？重播！冇錯，亞視由出世嗰日開始已經話畀你聽，佢哋係主力搞重播嘅，因為麗的呼聲電台一開始就係重播BBC嘅節目㗎嘛。係啊！我哋又行頭又執輸，我哋遲過人哋搞免費電視，但係我哋有原則喎。幾十年後今時今日，我哋重係做緊重播！*觀眾笑聲*
Red Diffusion 不特止，我哋重有革新。Red 的 fusion，red，fusion。Red fusion，red 的 fusion。九八年，紅色資金入主，我哋開始減少拍劇，red 的 fusion。一零年，王征入股好轟動㗎，red 的 fusion。唔係小弟王晶，征服個征啊，雖然嗰兩個人質地都差唔多嘅。*觀眾拍手* 我哋重有呢個廣東省嘅落地轉播權，red 的 fusion。成日都聽到新注資啊、新股東、新董事，係冇新劇集㗎啫。下下億億聲，但係你打份流工，連糧都冇得出啊！跟住呢幾年嗰啲，死過翻生啊，翻生又再死啊，有糧出冇糧出啊，出半份糧上個月唔出嗰啲，你哋知㗎啦。
*嘆氣* 我哋成日聽人講：「呢個國家進步緊㗎啦，文明咗好多㗎啦，畀啲時間佢吖。」亞洲電視上下一心相信呢一樣嘢，red 的 fusion。做咗先啦，唔好諗啦，畀啲時間佢。結果呢？亞視不再永恆，冇人可惜。噉香港呢？如果香港又嘗試 red 的 fusion，我哋可唔可以轉台啊？你肯唔肯？
*槍聲* *消音音效*