A Pinnula

[Testo di "A Pinnula"]

Sintiti amici cari chi v'haju a raccuntari
Un fattu stranu assai un fattu eccezionali
'U fattu di 'sti fimmini, beddi comu li mammuli
Ca pigghianu li pinnuli apposta pi campà

V'arricurdati Aida, chidda di San Cristoforu
Scappata cô francisi, 'ddu pezzu di figghiolu
C' 'a mini- minigonna ora ca è riturnata
Parra c' 'a er moscia, è tutta emancipata

A propriu l'autr'ajeri cu Lilla s'ancuntratu
S'abbrazzanu spiannucci: Aida unn'è ca ha' statu?
Haju statu 'nta la Francia c' 'u me beddu francisi
M'hâ 'rricriatu l'anima ca havi cchiù di tri misi

Beni, ma dimmi Aida comi è ca 'u poi capiri
Parra 'dda strana lingua e cu 'ddu straniu diri
Sapissi cara Lilla, chi lingua cauda e fina
Ca usa lu fagottu pari 'na sirpintina

È veru dimmi Aida ddocu 'nta 'ssu paisi
'Nvintarunu 'na pinnula ca si pigghia ogni misi
Pirchì quannu ritardanu li ospiti aspettati
Sunnu duluri 'i stomacu ppi schietti e maritati

O Lilla bedda cara, tu nun fari cchiù vuci
'U sacciu ca si 'llicca pi certi cosi duci
Perciò pi fariti vidiri ti vogghiu beni assai
'Na scatula di pinnuli, pir tia iu purtai

Ora quannu si â tavula cu lu to' giovinottu
Iddu intra la cìcara po lassari 'u biscottu
Però ancora prima di mettiti a mangiari
Du' pinnuli pi subbitu a menu t'hâ pigghiari

Allegri, tutti fimmini, vinni la cuntintizza
Approfittatavinni, mentri ca cc'è sosizza
Si diggirisci subbitu, 'a panza nun s'abbutta
'Sta prudigiusa pinnula sia biniditta tutta
'Sta prudigiusa pinnula sia biniditta tutta