Rheinhotel

He an dä Stell su vür knapp dressich Johr
He hammer jestande, jedräump un lange Hoor
De Jittar jeschnapp, op de Bühn, letzte Rund
Zom viertemol "Help", weil et Gerti drop stund

Blome em Hoor, "Sergeant Pepper" em Kopp
Un doch wood sich drusse öm de Mädche jeklopp
Wochenäng Razzia, zehn Uhr vorbei
Ming Fründin erwisch, keinen Ausweis dobei

He hammer all schon ens Musik jemaat
Niemols vun Morje un Sorje jeschwad
'Ne Blaue für jeden, Mädche un Bier
Dat all es e Stöckche vun dir un vun mir

Die "Screamers", die "Beat Stones"
Die "Shades", "Guys 'n Doll"
Samsdaachs un Sonndaachs wor dä Lade brechend voll
Un soß mer bes morjens am Rhing en ener Rund
Do mot us der Band wieder ener zum Bund

He hammer all schon ens Musik jemaat
Niemols vun Morje un Sorje jeschwad
'Ne Blaue für jeden, Mädche un Bier
Dat all es e Stöckche vun dir un vun mir

Su manchesmol, wenn ich die Bilder hück sin
Dann holt mich die Zick un et "Rheinhotel" en
Do ston se dann all su wie vür dressich Johr
Un singe: "The sun ain't gonna shine anymore."