Melote

Op ener blaue Jeeßkann an enem Brunne
Steit met 'nem wieße Dom bedruck
Dat se an et Levve erinnere wolle
Die Jeeßkann jehürt d'r Stadt Kölle

E Eichhörnche läuf
An enem Eichebaum erop
Do sitz en Reih Papajeie drop
Sin janz laut am Kriesche
Dann flejen se weck
Janz ruhich kütt ne Fuchs öm de Eck

Melote, Melote, suvill Dude
Suvill Nitjefrochte
Melote, wat e eijenartich Spill
Suvill Lääve litt he janz still
Kumm dich besöke dann un wann
Dat es keine Stuss
Denn schön es, wemmer blieve kann
Un nit muß

E Stöckche wigger
Die Verjessene vum Kreech
Kei Blömche un kaum e Leech
Ne Stein met enem Name
Vum Wind fottjedrare
Kaum noch ze lese
"En fremder Äd bejrave"

Wemmer dann de Millionenallee entlang jeit
Am Eng e riesich Mausoleum steit
Suvill Platz als letzte Ruhestatt
Hät manch einer em Lääve nit jehatt

Melote, Melote, suvill Dude
Suvill Nitjefrochte
Melote, wat e eijenartich Spill
Suvill Lääve litt he janz still
Kumm dich besöke dann un wann
Dat es keine Stuss
Denn schön es, wemmer blieve kann
Un nit muß

An enem Jravstein klääv ne jröne Zeddel
Nevven ner Trepp die en d'r Himmel zeich
"Nutzungsräch es afjelaufe"
Doch die Siel es längs em Himmelreich

Melote, Melote, suvill Dude
Suvill Nitjefrochte
Melote, wat e eijenartich Spill
Suvill Lääve litt he janz still
Kumm dich besöke dann un wann
Dat es keine Stuss
Denn schön es, wemmer blieve kann
Un nit muß

Denn schön es, wemmer blieve kann
Un nit muß