Dr Noah

[Strophe 1]
Lang ischs här da het mal eine öppis afa boue
Öppis win e grosse Chaschte, d'Lüt wos sy cho gschoue
Hei ne gfragt: «Was soll das gäh?». «Es Schiff!», het dise gseit
Aber s'isch keis Meer gsy und kei See dert wyt und breit

[Refrain]
Und me begryfft dass d'Lüt hei gseit:
«Däm Ma, däm spinnts!»

[Strophe 2]
Und si hei d'Chöpf ersch rächt gschüttlet wo das Schiff du speter
Het e Lengi übercho gha vo Drühundert Meter
Füfzig Meter Breiti dryssig Höchi und du no
Sytlech i dr Wand e grosse Türe dry isch cho

[Refrain]
Und me begryfft dass d'Lüt hei gseit:
«Däm Ma, däm spinnts!»

[Strophe 3]
Und si hei ne gseh i ds Schiff näh Loien und Giraffe
Nachtigalle, Zebra, Elefante, Söi und Affe
Schlange, Chüe, Rhinozeros, Gazälle, Dromedar
Känguruh und Kolibri – vo allem geng es Paar

[Refrain]
Und me begryfft dass d'Lüt hei gseit:
«Däm Ma, däm spinnts!»

[Strophe 4]
Und wo d'Tier sy drinn gsy isch är salber du mit syne
Söhn und syre Frou und syne Schwigertöchter yne
D'Lüt hei sech versammlet und gholeiet ussedra
Won er hinder sich die grossi Türe zue het ta

[Refrain]
Und me begryfft dass d'Lüt hei gseit:
«Däm Ma, däm spinnts!»

[Strophe 5]
Aber druf hets afa rägne; wi no nie uf Ärde
Langsam het me d'Fluet gseh stygen und geng höcher wärde
Einisch het dr Ma no ghöre brüele: «Löht üs dry!»
Aber gly druf isch zäntume Totestilli gsy