Romeo & Julia

Wenn du mi liebsch musch brächä
Versprächä dassmer brächä
Mit der Wäut, mitem Gäud, mitem Rächnä

Imene färnä Land si Wäsä imene Kubus ires Läbä lang
Luege enang nume dürne Luke a ir Gfängniswand
Jede isch mit jedem numä zuefällig näbänang
U ds änderet jedä Tag, und so ändet jedi Sprach
Jedi Zäuä het ä Türe wo es Schloss het
Doch nur vo änädra chasch gspüre wi ds bout isch
Si het Plän gmacht fürnes Schlüsseli us Houz gschnitzt
Doch ds z beschribä würd bedingä dass är Wort fingt
U so achtet si sich druf, immer denn wenn si sich gse
Dass me Zeichä lehrt und redt, zersch mit Geschtä när mit me
Und viles rückt nach, ä offni Tür und vilech Glück
Nur s Drücke vomne Arm, und dr Schlüssu gwinnt a Form
Jedi Nacht s chlises Stück, jedes Küssli git dr Takt
Bis am Tag wo si erchlüpft, wüu dr Schlüssu macht „Klick“
Und d Türe isch iz off, und si stö sich gägänüber
Und si gspüre ds Paradox, dassd nur frei bisch
I gschlossene Arme

Und iz, iz hei si sich, ändlech schiint aues so schön
Gränzä schiine au zerstört, aber si, si si nur sich
S geit nid drum, dass me sich gwöhnt
Sondern, dass me vieles bruucht
Ä Muetter und ä Fründin und ä Schwöschter und ä Huer’
Ä Büezer und ä Lehrerin, ä Pfarrer und ä Buur
Si si geng no imene Chefig, nur mit dopplet so viu Ruum
Aui Chefige müesste uf, doch au befreiä so viu z tüe
So viu Wüssä, so viu Schlüssle, doch si gspüre: si si müed
U statt ds Richtige z mache, male si Gsicht vo angerne ab
Schnitze se us Houz, u legä sich iri Maske a
U so si si sich ä Muetter, und ä Büezer und ä Huer’
Spilä sich di ganzi Wäut ufme winzig chliine Ruum
U so wärdä si schnäu aut, erschöpfä sich, schöpfä Hass
Entscheidä eines Tages z scheidä, wüus nä beidnä nümmä passt
Und schnitzä ä letschti Maske mit viu Liebi füre Tod
Und läbä geng no hüt, wüu är natürlech nie isch cho

Du bisch s Füür ir Nacht wo schnäu schwach wird
We jede Tüüfu i mir um di Platz nimmt
Du bisch ä sehr tüüre Spiägu für mi Ässtisch
Ä sehr tüüre Spiägu für mi Ässtisch
Du bisch ä Rose im Schnee wo schnäu weukt
We jedä Blick vo mir uf di zeut
Du bisch ä sehr tüüre Spiägu für mi Ässtisch
Ä sehr tüüre Spiägu für mi Ässtisch
Für di trinki ds Gift wo mi tötet
Doch vor Erschöpfig ischs äuä nüm nötig
Du bisch ä sehr tüüre Spiägu für mi Ässtisch
Ä sehr tüüre Spiägu für mi Ässtisch

Wenn du mi liebsch musch brächä
Versprächä dassmer brächä
Mit der Wäut, mitem Gäud, mitem Rächnä
Nid i Dollar, nid i Frankä, nid i Räppler
Nüm i Dopplet und Prozänt, nid i Zähtlä
O nid i Stund, nid i Arbeit, nid i Wärtä
O nüm i Küss, nüm i Gfaue und Versprächä
Giz no Liebi, muessme brächä
Mit der Wäut, mitem Gäud, mitem Rächnä