Proverbi siciliani

[Testo di "Proverbi siciliani"]

Tutti li cosi vannu a lu pinninu
Ed a lu peju 'un cci si 'nclina ognunu
A cu' duna a cu' leva lu distinu
E nun cci pari mai lu nostru dunu

Nun curri paru lu nostru caminu
Pocu cridi lu saggiu a l'importunu
Lu riccu mancu cridi a lu mischinu
Lu saziu nun cridi a lu dijunu

Pi troppu ventu lu vasceddu sferra
Pi la gran frevi lu malatu sparla
'’assai cunsigli si perdi la guerra
E pi tanti giudizii si sgarra

Lauda lu mari e teniti a la terra
Pensa la cosa prima ca si sparla
Pirchì haju 'ntisu diri a la me terra
Cu' fa li cosi giusti mai li sgarra

A chianciri figliuzza chi cci cavi
Lu sangu t'arribbelli e po' muriri
Pacenzia ci voli a li burraschi
Ca nun si mancia meli senza muschi

Ma cu' du' lepri voli assicutari
Né unu je né l’autru po' aggarrari
Ma cu nun fa lu gruppu a la gugliata
Perdi lu cuntu cchiùi di 'na vota

Cci dissi lu jadduzzu a la puddastra
Tuttu lu munnu è comu casa nostra
Cci dissi la padedda a la gradiglia
Haju pisci grossi, mancia, e no fragaglia

Accosta veni cca mancia carduna
Ca a lu casteddu mancianu picciuna
'Rispunni e dici lu ziu Nicola
Si la pignata 'un vuddi nun si cala

Lu picuraru ca fa la ricotta
Lu sapi iddu l'amici ca aspetta
La furca nun è fatta pi lu riccu
È fatta pi la testa di lu porcu

E...ni la testa d'un maiali
Eu ci manci tu ci sciali
Ni la testa d'un cunigliu
Nenti lassu e nenti pigliu

Timpirateddu ti vivi lu vinu
Ca ti teni lu stomacu ntonu
Cu' ammucciau lu latinu
Fu 'gnuranza di parrinu

'Un cc'è festa e né fistinu
Si ’un c’è un monacu e un parrinu
Ma lu monacu dâ Badia
A Gesù lu patrunia
Cc'è la monica di casa
A Gesù lu stringi e vasa
Ni la casa di Gesù
Nzoccu trasi 'un nesci cchiù

Ma cu' havi 'na bona vigna
Havi pani, vinu e ligna
E lu trivuli e lu beni
Cu' cci l'havi si lu teni

Quannu chiovi di matina
Pigghia l'aratu e va' simina
Quannu veni lu giugnettu
Lu furmentu sutta lu lettu
Ma la luna di jinnaru
Luci comu jornu chiaru
Signuruzzu chiuviti chiuviti
Ca 'i lavureddi su' morti di siti
E si acqua 'un nni mannati
Semu persi e cunsumati

L'acqua di 'ncelu sazìa la terra
Funti piena di pietà
Li nostri lacrimi posanu 'nterra
E Diu nni fa la carità

Nesci, nesci suli, suli
Pi lu santu Sarvaturi
'Etta un pugnu di nuciddi
Arricrìa li picciriddi
'Etta un pugnu di dinari
Arricrìa li cristiani
'Etta un pugnu di fumeri
Arricrìa li cavaleri
(x2)