On sait

ملاحظة : الكلمات غير منقحة بعد ، ستتم مراجعتها في وقت لاحق

[اقتباس1 من خطاب للراحل بومدين]

[دخلة]
نايلـــــي
أرواح تسمع في العهدة الثالثة ...الألبوم الثالث
خيّر و اختار..خيّر
بين السّمّ لي يفطنك ولّا حط نيمرو في ظهرك و أدخل في الصّف
و خليهم يقولولك : أرفع راسك يا با ، أرفع ...راك فرحان ؟

[المقطع الأول]
علابالنا شكون لي راه الفوق ، شكون لي راه التحت
شكون لي راه قاعد في الكرسي ، شكون لي يحوّس يفحّت
شكون لي دار الصح شكون لي بروفيتا من الوئام
شكون لي بزنس و دار الجاه المال على ظهر اليتام
شكون لي راه كاره شاد الحيط قاع النهار
شكون لي راه زاهي شاد الكاس و يتكيّف في السيجار
شكون لي راه بايت برّا و لاخر عندو مئة دار
شوية كيف ، شوية شراب هاو ننسُو لي صار
شوية موسيقى ، شوية بيتيتات و راه يرقص
كل يوم مع جماعتو في سدر لبلاد راه يمص
و مبعد شكون لي راه يْخَلَّص ، و شكون لي راه يَخْلُص
الدنيا تقولنا شكون لي يولّي راجل و شكون لي يرخس
الزوالي يتفرج و القماقم تدّي في البروجيات
قولي شكون لي ساكن القصديري ؟ شكون لي ساكن الفيلات ؟
في التسعينات علابالنا شكون لي سلك و شكون لي مات
و ايلا ما فهمتنيش ما عليش ياو الأعمال بالنيات

[اللازمة]
روح سقسي خاوتي يقولولك علابالنا
و خاطر علابالنا لازم نقولو كلمتنا
ما عندنا ما نخسرو خاطر ديجا خسرنا
و المستقبل مهما كان ياو راه لينا

[اقتباس2 من خطاب للراحل بومدين]

[المقطع الثاني]
قولي علاه القاري يهجر و الجاهل يولّي مير
البزناس يولّي ديبيتي باه يدخّل لبوابير
و الديبيتي يولّي سيناتور باه يعاود يطير
هوما يعمرو جيوبهم و الشعب راه يخلّص الفواتير
علابالنا قاع علاه الكيف راه يدخل بالقناطير
علاه ؟؟؟ و الزطلة من العقاقير
علاه البنات راهي تخمّم تلبس كيما بريتني سبيرز
ما يعاودش يسير خمسة أكتوبر la jeunesse رقّد
علابالنا بلّي البترول رجّع الخزنة مليانة
و جيب الشعبي قاعد غير يفرغ و الأمة جيعانة
علاه توصل كي كنت تعرف الهف ، الكذب ، الخيانة ؟
و تسوفري كي تعود تمشي بالنية الصافية و الأمانة ؟
الله يرحمك يا لالة ...ياو ديمقراطية
علابالنا بلّي كذبة كبيرة عليك و عليا
لوكان تعرف خويا استعرف ياو دّير مزية
الصح تاعنا يضرب الذهب ياو ماشي شوية

[اللازمة]
روح سقسي خاوتي يقولولك علابالنا
و خاطر علابالنا لازم نقولو كلمتنا
ما عندنا ما نخسرو خاطر ديجا خسرنا
و المستقبل مهما كان باو راه لينا

[اقتباس3 من خطاب للراحل بومدين]

[المقطع الثالث]
علابالنا بلّي الشاب قلبو يبس و عقلو حبس
قطع لياس و مع الوقت لبسة الذل راه لبس
علابالنا كلا المطرق حتّى ما ولّاش يحس
! من الدنيا شاف غير الشر ، الشرُّ بسْ
علاه التالي راه ياكل الخبز يابس و يبات في الكرطون
في بلاد مازال كاين ناس تموت بالطاعون
و عندنا ديبيتي يبكي باه يخلص شحال من مليون
و كي يحب يزهى يفوت السهرة في الشيراطون
شوية شوية القلوب ولّات كحلة حموم
بصّح يحسن العون ما تنجّمش تلوم
ما دام لي راه الفوق على الميزيرية راه يصوم
و لي راه التحت في دعوة الشر راه يعوم
خاطر لي كاين الفوق على كتف باباه كاين نجوم
و لي راه التحت على ظور والديه كاين لهموم
كي تحوس تعرف هاذ الشي لـ وكتاه راح يدوم ؟
شوف شكون كان يحكم البارح شكون راه يحكم اليوم

[اللازمة]
روح سقسي خاوتي يقولولك علابالنا
و خاطر علابالنا لازم نقولو كلمتنا
ما عندنا ما نخسرو خاطر ديجا خسرنا
و المستقبل مهما كان باو راه لينا

[اقتباس4 من خطاب للراحل بومدين]