Lamentu pi la morti di Turiddu Carnivali

Ancilu era e non avia ali
Santu non era e miraculi facìa
'n celu acchianava senza cordi e scali
E senza appidamenti nni scinnia;
Era l'amuri lu so' capitali
E 'sta ricchizza a tutti la spartìa
Turiddu Carnivali nnominatu
E comu a Cristu muriu ammazzatu

Cristu di 'n celu lu binidicìu
Cci dissi «Figghiu, tu mori ammazzatu!
A Sciara li patruni armi addannati
Ammazzanu a cu voli libirtati
Arricugghìu li poviri, amurusu
Li dorminterra, li facci a tridenti
Li manciapicca cu' lu ciatu chiusu:
Lu tribunali di li pinitenti;
E fici lega di 'sta carni e pusu
Ed arma pi luttari li putenti
Nni 'ddu paisi esiliatu e scuru
Unni la storia avia truvatu un muru»

Dissi a lu jurnataru: «Tu si' nudu
E la terra è vistuta a pompa magna
Tu la zappi e ci sudi comu un mulu
E stai all'additta comu 'na lasagna
Veni la cota ed a corpu sicuru
Lu patruni li beni s'aggranfagna
E tu chi fusti ogni matina all'antu
Grapi li mani ed arricogghi chiantu»

Dissi: «La terra
È di cu la travagghia
Pigghiati li banderi e li zappuni»
E prima ancora chi spuntassi l'arba
Ficiru conchi e scavaru fussuna:
Addivintò la terra una tuvagghia
Viva, di carni comu a 'na pirsuna;
E sutta la russìa di li banderi
Parsi un giganti ogni jurnateri

Sidici maggiu l'arba 'n celu luci
E lu casteddu àutu di Sciara
Taliava lu mari chi stralluci
Comu n'artaru supra di 'na vara;
E tra mari e casteddu 'na gran cruci
Si vitti 'dda matina all'arba chiara
Sutta 'dda cruci un mortu, e cu l'aceddi
Lu chiantu ruttu di li povereddi

Ancilu era e non avia ali
Santu non era е miraculi facìa