給大衛的情書 (A Love Letter to David) (Live at Hong Kong Coliseum 2017)

[達明一派「給大衛的情書 (Live)」的歌詞]

[讀白]
欸，好多謝你哋。Umm，其實要講嘅嘢呢喺我哋啲歌裡面都講曬。啊，我只係想同大家分享，啊，分享一封信。呢一封信係一封情書嚟嘅。

「親愛的大衞·寶兒，ashes to ashes, funk to funky，你離開咗我哋已經一年有多。你踏住星塵回到你嗰個黑色嘅星球，但係你嘅音樂、你嘅歌、你寫過一字一句，卻繼續存活喺我嘅心裡面。關於你，有一個歌手Jarvis Cocker曾經噉講，佢話：『He was like an umbrella for people who felt a bit different.』意思啫係話對於我哋呢一啲異類、異種嚟講呢，你就係撐住我哋嘅一把傘。當我哋害怕，當我哋害怕自己異於常人，或者當我哋被社會打垮嘅時候，你嘅歌總係會讓我重新得力，讓我哋重新得力。1997年香港回歸嗰一年，你同林夕合作寫咗一首歌叫做〈剎那天地〉，裡面不斷噉唱住：
『我祝福你 天地不過一剎那
我祝福你 一生一剎那』
我想將呢一首歌送畀天上嘅你，亦都希望你喺上面保佑，保佑我哋，保佑嗰啲被呢個社會打垮，被呢個社會令到佢哋覺得好挫敗嘅一羣。佢哋係邊個？其實係好多人。佢哋係可能係包括叱咤於漆黑街中嘅馬路天使、皇后大道、十個救火的少年。或者係仍然愛住老大哥嘅Winston同埋Julia，等待一個明月出現嘅青豆添。同埋，尋找理想嘅家明、羅賓，重有Alexter、Ken Tsang、梁天琦。重有親愛的瑪嘉烈、露絲瑪莉、勞斯萊斯、秀麗樂敏、偉業永達，所有燈光裏飛馳失意嘅孩子。無論個世界有幾壞，我哋有幾咁失敗，我哋覺得自己有幾咁奇怪，係呢個黑色星球嘅你，請你祝福我哋。」