CHOUFT L3MA

Paroles de Mehdi K-Libre "CHOUFT L3MA"

Traduction française
[مقطع وحيد]
حكمت علي الأقدار نولّي اعمى، بعد ما كنت تنشوف
اربعين عام فالضو اليوم غير فراسي تدّور
عمري عرفت الضلام حيث مشالي الضو باش نردّو
ماشي بيدّي وعارف راسي بلا بيها ندوخ
حسيت براسي إنسان واحد آخر، لا لداخل لا برّا
نص فوجهي تغطى ونص فعقلي تعرّى
ماشايف والو حاس بالدموع منين تايهبطو
عين تتبكي على عين وخا هوما بجوج تسدّو
جاتني غريبة نفيق فالصباح بلا منشوف فالمراية
ولا ضروري ملّي نخرج خاص واحد معايا
مرضيتش بحالي
بعد منين سولت عرفت باللي فالعالم كاين شحال من واحد بحالي
تعلمت نبكي باش نتفاجا
فراسي قلت معندي زهر، حيث أنايا مشيت منين هو جا
الجيب، كان يسحابتلي يجيبلي اللي بغيت
فرحت منين عمّرت وشريت البلا اللي بيه دبا عميت
عرفت علاش قالوا الطمع طاعون
العمى تيبقى عمى لا مشاتلو العين وخا يكون فرعون
فاللون، ولا فالدين يمكن نختالفوا
ماشي جيران فالدنيا، فالآخرة غادي نتشاوفوا
40 عام من حياتي، فراسي ولات تدوز بحال فيلم قصير
مخرجو الضلام وسكاتي، اللي مثلوا معايا فيه بعدوا عليّ
وخا عمرهم كانوا ما قراب، اليوم يتشفاو فيّ
عارف راسي حتى أنا ماكنتش مزيان، ماكنتش فرحان
غاطس راسي فالشراب، هكدا كان الحال
كل نهار معمّر البار، وخاوي داري كان
عند بالي تنمشيلو مريض تنرجع باري
ماكنتش عارف الدنيا خداعة
عرفتها منين شفت داكشي اللي بنيتو فعوام، مشالي فساعة
حسيت براسي ضعيف، ملقيت ماندير قلال اللي تعاطفو معايا
فبلاصة العمى سماوني بصير
دازت الأيام العمى ولّى تيشوف، وخا فالضلام ولّى تيحس
مابقاش تيخاف ولّى تيسمع، اكثر ما تيهضر
مابقاش تيقمع، اه ولّى يفرق بين ابيض واكحل مزيان و خايب
الفرحة ماتشرى بفلوس، عليها عمري ما لقيتها
عليها الفلوس عندي طاحت قيمتها
كان يسحابتلي الفرحة فالفلوس، ساعة الفرحة فالنفوس
فقير ولّا غني شكون بيها غيفوز
رجعت اللّور نشوف حياتي، اللي دازت مع ولادي
مع واليديّ فوسط داري مع مراتي
لقيت راسي مقصر فحقهم، غاضبانين عليّ
ولادي ماكبروش قدام عينيّ
المشكل ماشي بنادم يغلط، المشكل هو بنادم يغلط يبقى كمّال
مع راسو شاد الضد
الدنيا امتحان، تا حد فيها ماكامل
باش تكمل فيها خاصك تعرف كيفاش تعامل
نهار مابقيتش تنشوف
عرفت باللي ولّيت تنشوف شحال من حاجة عامي عليها هداك اللي تيشوف
عرفت بحق العائلة ماخاصش نتفارقو
ماحدنا فالدنيا، على الخير خاصنا نتسابقوا
يمكن عرفت هادشي معطل ويمكن فات الفوت
المهم عرفت باللي غالط وباغي نولي احسن
لڭاع اللي تيشوف وبصر وعمى البصيرة
بغيت نقولو باللي الدنيا والحياة قصيرة
تيبقى المعقول منين تيحيّد الديكور، اه
فين هما اللي قالوا، خوتي وخا بلا دم
من بعد عام مابقيتش عل العمى نادم
حيث عرفت قيمة الكلاب، يورِّيوك الطريق احسن من شي بنادم