Trainer

Yuh tink a little bit a tings me go through, Trainer?
I used to live inna one yard which part
Everybody tink dem better off dan de odder
An de only ting me coulda do
Fi meck dem know dat me naw skin up
When de area ready fi go erupt
Is fi meck dem know
Dat me a is a man that will bun up harp
An tear off house-top, because
I got some wicked thoughts

Me a tell you, Trainer
Dat I pass some man pon corner
Dat I know a some ole murderer
An see I ya? I still deh ya!

Dat one night
A jus get up
For a feel fed-up
An flash de area

A teck a walk come up ya
Dat when yuh teck a stock
Is a dance a en up at
Dance crash. An a ready fi tracks
But las bus stop
A never have no taxi fare
Plus a jus never did live anywhere
So a jus walk
An hold me head in de air

A naw tell no lie
Jus as a reach de square
A hear a man seh
'Kiss me ass! A goin help yuh
Fi reach home before it dark!'
An im grab one little bwoy inna im wais
An before de little bwoy coulda open im mout
Im seh, 'A who give you permission fi talk?
How ole yuh is
Fi a stay outa yuh yard till after dark?'
De bwoy seh, 'Me? Me a fourteen, sah.'
An de man dash on de cat-a-nine
An im bawl out, 'Lawd Jesus Christ!
Me a twenty-nine!'

Me couldn tell im dat me no live nowhere!
So me pull a skank despite im rank
By dis time a three day me no sleep
An God bless wha me eat

A beg a piece of newspaper
An a head fi de public house
Dat dem seh renk an full a crab-louse
Dat when a reach deh
A jus satta an fall asleep
Because I did feel well weak

Yuh kow what wake me up, Trainer?
Is a man come deh inna de early mornin
Im mus did know is a human
Siddung deh a ketch a nap
Yet im dash a bucket a Jeyes water pon me
Widout even sayin sorry at dat
A look pon im. A never seh one ting
For yuh know how a did feel, Trainer?
Fi kill im!

A teck out me ice-prick an a grab im
An same time a hear something seh, 'No jook im!'
An anodder ting seh
'Jook im inna im neck meck im run an fret!'
An a see a whole heap a blood
Jus a circle roun im. An a let im go
Siddung, an laugh. 'But look pon you, to rass!'

Same time a man come on an seh, 'Get up!
Yuh doan see dat dis-ya place ya dutty-up?'
An a look pon im, an a never seh one ting

For it was de firs time in me life
A really reel fi seh someting
An a couldn bring out nuttin

So a jus walk