Der Eskimo

Kennet dir das Gschichtli scho
Vo dem armen Eskimo
Wo in Grönland einisch so
Truurig isch um ds Läbe cho

Er het dank em Radio
Fröid ar Musig obercho
Und het tänkt das chan i o
So isch er i ds Unglück cho

Nämiech är het sech für zwo
Fläsche Labertran es no
Guet erhaltnigs Cembalo
Gchouft und hets i d'Höhli gno

Doch won är fortissimo
Gspilt het uf sym Cembalo
Isch en Ysbär ynecho
Het ne zwüsche d'Chralle gno

Kunscht isch geng es Risiko
So isch ar um ds Läbe cho
Und dir gseht d'Moral dervo
Choufet nie es Cembalo
Süsch geits euch grad äbeso
Wie däm armen Eskimo
Wo in Grönland einisch so
Truurig isch um ds Läbe cho