U cignale

Da la Punta à la Giraglia sinu à Capu Pirtusatu
Ci si ne trova più d’unu cacciadore rinumatu
Ma lu cignale maestru sò eiu chì l’aghju tumbatu

Fù lu trent’unu di dicembre à stagione venia à fine
Ne pigliedimu la strada à le stelle matutine
U fiore di l’omi valenti è di le bestie mastine

I trè ghjacari chjamati Orbu, Culombu, è Pichjone
Sgualtri quant’è la saetta feroci più ch’è leoni
Mi sbuccone arruvimendu da l’impostu à lu stagnone

L’animale era feroce è di gran’musculatura
Ma nun ci hè statu scrittore pè nutalu in scrittura
Ma nun ci hè statu scrittore pè ritrattallu in pittura

D’un solu colpu tiratu è lu saltu l’aghju tombu
È si vide piove focu ancu fulmini di piombu
Per tutti quelli cuntorni intunati da lu ribombu

Ci volse una settimana intera per fà spartizione
Chì c’era centu paesi di sette è ottu cantoni
È ognunu pretentia à la massima purzione

È tuttu lu mondu sanu China, Francia è Inghilterra
Bianchi neri è frisgiualti chì ùn cunnoscenu a so cera
Dice chì animali di quessi ùn ci n’hè nantu à sta terra