Tulln

Zwischen Zuckerbude und Kadaverfabrik
Wos siaßld oda noch hinige Viecha riacht
Wo de Kinda in da Fruah ins Bushittl schlatzn
Und a Meubal noch da ondaren hatzn
Durt hod mi mei Mutta in ana Dunnastog Nocht
Wos blitzt und dunnad hod auf de Wöd brocht
De erstn poa Joah in da Langenlebarner Stroßn
Die Nochbaskinda san am Zaun draußen gstondn
De Tochter woit i heiratn, des homa se gschwurn
Doch noch a poa Joah homa se aus de Augn valurn
Und daham san de Fetzn gflong
I hob mit de Maxln gspüd, zwa Mastersburgen hob i zu Weihnochtn griagt
Im Kindagoatn sans Tyrannen gwesn
Won i eana de Wuaschtsemml ned gem hob dann homs mit tretn
In da Voikschui in da 10a Pause in de Knochenbar grennt
Den klan Buam mit de Schneckal den homs duat scho kennt
91' is da Voda in Hefn marschiert
In da Zeidung is gstondn, woa groß inseriert
Für de ondan Kinda woas a gfundenes Fressn
Noch da Schui bin i zur da Urli zum Essen
In Wien im Weberknecht is Köchin gwesn
Im Summa woa ma Strohfian und im Herbst woa ma lesn
Und im Winter woa Eisdisko, Saisonsperre bekommen
Da Eismasta hod en Bastl des Tschickpackl wegnummen
Im Summa sama im Aubod bei da Rutschn glegn
Wenn ma Schuigstangld hom homa se duat de Kantn gebn
Da Stodtparkfredl hod da 500 Schilling gem
Wennst eam beim Wixn zuagschaut host dann hoda des megn
In da Bluadgossn des erste moi Wundbenzin gnumma
De Mutta hod greart und in de Schui hods miassn kumma
Jo zwischn Glosscheamviadl und Eierspeisbautn
Wo de Haidingers und de Heischneiders hausn
Jo durt bin i her, vo durt bin i davogrennt!
Wos hinterrucks redn, dort wo se jeda kennt
Wo de Blumen so sche san hods an Campingplotz gem
A Madl is dort Dauercamperin gwesn
Niki hats ghaßen, an Summa woa ma zaum
An am Obnd is vo da Diskothek ham
Hod se dastessn min Auto, da Foahra woa bsoffn
Jo Vüle san ogstiazt, owa uns hods ned troffn!
Sunst darad ma heid ned do sitzn und singa
Übern Hauptplotz, übers Parkdeck, übern Fließ und an Schlinga
Über de Kunstwerkstod, de Donaulände, über de Mauthausgossn und über de ongschmierten Wände
Über de Pezo sein Kölla
De Pumas Lockn
Übers Bohnhofsresti wo die Drangla drin hukn
Jo zwischn Zuckerbude und Kadaverfabrik wos siaßld oda noch hinige Viecha riacht