Matar - مطار

[المقدمة]
آه، ماشي، بص

[اللازمة]
هدّيك سببين
الدنيا غريبة والغيرة في العين
أربعة وعشرون سنة بصراحة مش عارف تيّارها واخدني ورايحين على فين
بحب الهزار بس حاسب النار
عيلتي من البلد وبناخد التار
وقت المعركة مش بدي إنذار
لازم قرار
حاسس إن أنا في مطار

[المقطع]
وصلت متأخر ومش لاقي تذاكر
الناحية دي مسافر، الناحية دي مهاجر
بس من الآخر، اللي في أصولي ورجولتي دا نادر
وفي زمن السوشيال، عبادة اللايك بتخلي محترم كداب ومنافق
واثق من نفسي ومش لازم أتّنك في القعدة وأفهم الناس إني خارق
يمكن دي غلطة، شوفوا الأغاني إللي ضاربة
لأ المجال مش في ورطة
طبيعي الغلابة بتدوس على بعض عشان يبقوا في يوم من الأيام العمالقة
ما أحبش أشتكي
بحب أبقى واضح مع نفسي وأدوّر وألاقي غلطتي
فعرفت سكتي
هنا في دايرتي، أفكارنا في الجون وكلامنا منطقي
شفت حب، كره، خيانة، غدر
الكلام رخيص والكدب سهل
بقيتوا إزاي أعداء ما كنتوا الأهل
بقيّم الشخصية مش الشكل
بمناسبة الشكل
ما يغرّكش لون الشعر
إنك تقل مني صعب
هتلاقي نفسك إتسرعت
هتلاقي الضرب ورا بعض
حقي بيتسابش والشخص اللي بيجي في سكتي بفضاله
لو مش وصلاله فمعايا الكتيبة
هنسمم البيرة ونسرب أسراره
في الماضي فوّتّ في مواقف كتير وإتخدعت
وإتعلمت فيما بعد إن فيه اللي بيهرج
لو جت على حسابي هتغابى والذكرى هديها بالكعب
ننسى اللي حصل لما ينزل المطر
وعد كان بيننا واتكسر
بنثق في كلاب وبنخوّن البشر
شفت سخرية القدر؟
بتعلم أحط للناس في التعامل حدود
الدنيا أرانب وأسود
في اللي هيحبك لله بالمجاني
في اللي بيخُون مهما كان المجهود
ممتن لمواقف خلتني أبقى راجل
قدامي إختيار وربما يكون خاطئ
مش هقعد أماطل
الدنيا بتتغير فلازم هنخاطر
هنجازف ونفوز مش هنعيش من سكات
مش بتتشاف ورا شيش وشباك
بفهم في الفن وبتكلم لغات
فعلاً مفيش وقت للتأملات، ولا البكاء
الناس دي بتتباهى بالبخل
في حاجة أهم من الشغل
رايح البلد، راجع من البلد
كل أسبوع، عمري ما دوخت
عمري ما كنت أي حاجة غير أسطورة
برا المزيكا أسطورة
الناس دي مجرد مشهورة
في الحقيقة غير الصورة
جوايا وجع مش هينفع يتحكي في أغنية حزينة
خواطر مؤلمة، نفسية تعبانة
عين مزغللة والنية سليمة
عاملينلي أجانب وبيكرهوا نفسهم
إرجعوا لأصلكوا الثقافة دي إتهانت
بس

[اللازمة]
هدّيك سببين
الدنيا غريبة والغيرة في العين
أربعة وعشرون سنة بصراحة مش عارف تيّارها واخدني ورايحين على فين
بحب الهزار بس حاسب النار
عيلتي من البلد وبناخد التار
وقت المعركة مش بدي إنذار
لازم قرار
حاسس إن أنا في مطار