Le puits de la mélancolie

Ou puis parfont de ma merencolie,
L'eaue d'espoir, que ne cesse tirer,
Soif de confort la me fait desirer,
Quoy que souvent je la treuve tarie.

Necte la voye ung temps et esclercie,
Et puis apres troubler et empirer
Ou puis parfont de ma merencolie
L'eaue d'espoir, que ne cesse tirer.

D'elle trempe mon ancre d'estudie,
Quant j'en enscrips, mais pour mon cuer irer
Fortune vient mon pappier dessirer,
Et tout gecte par sa grant felonnie.
Ou puis parfont de ma merencolie.