الدراويش والعز | El Draweesh W El Ezz

[اللازمة]
في وسط الدراويش، بغني وبعيش
وعارف مين رضي، ومين الغيرة فيه
ف لو هتروح في نار، متأذيش ضِعاف
يا بخت المظلومين، ناموا مرتاحين

[المقطع الأول]
زارع ارضه، طارحه بأصله
عيشة هادية وساتره ربه
"يا اماه الجوع كافر ليه أعيش فيه؟"
ما ابن آدم لو إيه ما يرضيه
رهن قيراطين، من ميراث أبوه
وراح بنى بيت، يشيل مصالحه
إيجار شقة، ومستشفى
سطوحها جامع، "على مين يهِدوه؟"
سافر حج "يتوب من اللي فيه"
رجع باشا وله ألف سيط
ف راح أرضه يفك الرهنية
لقى امه ماتت من سنتين

[اللازمة]
في وسط الدراويش، بغني وبعيش
وعارف مين رضي، ومين الغيرة فيه
ف لو هتروح في نار، متخونش الصحاب
يا بخت المظلومين، ناموا مرتاحين

[المقطع الثاني]
ومتابش لا قسي أكثر
زرع ارضه بسماد مسرطن
ف الفلوس كترت، النفوذ كبرت
بقا عمدة وله حساب
وشاف واحدة، عينه لمعت
قال هاخدها، مش هتفلت
لقاها مخطوبة، لعبد المولى
صاحب عمره عِشرة سنين
قال "هديله ٢٠ قيراط"
"ليك البلد، اشر اختار"
عبد المولى رفض، وصاحبنا قمص
قام اداله ٢٠ عيار

[اللازمة]
في وسط الدراويش، بغني وبعيش
وعارف مين رضي، ومين الغيرة فيه
ف لو هتروح في نار، متأذيش ضِعاف
يا بخت المظلومين، ناموا مرتاحين

[المقطع الأخير]
باع الأرض وقلبه مات
مخدرات ومصنع سلاح
كبر أكتر ساب جلابيته
"خلاص بقينا رجال أعمال"
لف العقرب، جاب الواد
امه كانت بنت حلال
"فلوس أبوه دي متلزمنيش"
بركة عرقها تربي أجيال
فجأة قامت هوجة في البلاد
"عاوزين نمشي التمثال"
صاحبنا خد خبر قال "هنهرب"
لقى ابنه مات بسلاح أبوه
(يا مايو)