KELMEH - كلمة

ما رح انسى الكلمة، اصلا كيف انساها؟
كتاب الاكتئاب انفتح و بلش من وراها
لما حكيتها حسيت بقوة؟ وانت اللي مافيك احساس؟
اذيتني شوهتني من جوى، شكرا الك يا اقرب الناس

احكيلي هل استفدت؟ عبيت النقص اللي فيك؟
هل ربي خلقلي الخطئ وانت انخلقت مافيك اللي يخطيك؟
قلي، قلي، بدون ولا كلمة زايدة
قلي، قلي، مين هسا الما اله فايدة

بيتمنو عدمي ولا زي كني زيهم ادمي
ما حيفيد ندمي ولا رجوعي في خطى قدمي

ايش عملتلك؟ ما ضل خير الا بالبحر رميته
عادي اذا بدك انكر، لو بستنى الرد ما كنت سويته
ما رح ينسى القلب، حتى لو فقدت الذاكرة
فلا تكذب على حالك في يوم و تحكيلي اني كنتلك نكرة

“فاشل” حكسر عينك و اوصل افاق
“بكرهك” احكيلي من اول ليش النفاق؟
ليش الكذب؟ ليش الاذى و ليش الشيانة؟
ليش اللعب؟ ليش الحدا الحبيته بادلني بخيانة؟
—
احكيلك كم مرة اذيتني؟ بحكيلك كم مرة سكتت
بالسعادة جبتلك كم، وغير الهم الي ما جبت
انت تحولت، وانا انهلكت قد ما حاولت
ولا توقعت، تيجي تحكيلي انك بتضيع وقت

انا القديم اول ما بصحى همي الوحيد كيف ارضيهم الليلة
وانا الجديد اذا انهزت الارض ومافيها ما تشوفولي ميلة
مستعد اخسرك و اخسره، وابيع الباعوني بالشيلة
الحياة مش واقفة عحد ولو واقفة مخسرتش صحابي و العيلة