Ivana’s Monologue (Live at Hong Kong Coliseum 2014)

[王菀之「Ivana’s Monologue (Live at Hong Kong Coliseum 2014)」歌詞]

[讀白: 王菀之]
（你已經不是以前的王菀之，變得商業化了？）
宣傳呢個演唱會啦，會有一個記者好直接噉同我講：「我以前曾經係你嘅歌迷嚟㗎」噉啊。噉我就會問佢：「噉點解而家唔係呢？」「冇啊，因為我見你拍戲同拍電視劇喇嘛」噉樣。啫係話原來我想發掘得自己更多，我咁努力去嘗試更多嘅嘢，就係佢哋離開我嘅原因。其實傷心㗎。我係純粹好想將每一個嘅藝術表演都好 respect 嗰一次嘅機會，好想做到最好，同嗰個團隊一齊經歷一個美麗嘅時刻囉。呢啲 moment 無論我係着緊咩嘢衫，演緊一個咩角色，要我做到幾醜化或者係幾搞笑或者點樣，因為大家個向心力都係希望將呢一樣嘢做到最好，所以我係好 enjoy 經歷同一個團隊去將一樣嘢做到最好。

減肥前。（可以瘦一點嗎？）減肥後。係啊，冇效㗎！
你嗰個減肥嗰樣嘢呢，我明明一方面又覺得：「嗱，你望住自己肥到隻豬嗰陣，你係咪會覺得……」啫係好後悔點解—「唉！如果瘦啲就好啦！」又後悔又鬧，嬲自己啦。但係呢，到你好攰嗰陣時，好肚餓嗰陣時，又減極都係一樣嗰陣時，噉啊會諗：「其實我點解一定要減肥呢？我唔係應該唱好隻歌，或者跳好呢隻舞，就得㗎啦咩？」跟住另外一邊就話：「你知唔知道，做 artist present 自己到應該係要 perfect 㗎嘛。」噉呢個問題就係呢度啦：我覺得肥肥哋都幾 perfect 啊，我自己係噉樣諗。

（只有一場，失望嗎？）
噉會有呢個失望。但係我呢近排呢 turn 呢樣嘢做 positive 嘅諗法喎。我就覺得，都仲有一場嘅人，都唔少㗎吓，你講緊嘅係都好多千人㗎，願意去品嚐你嘅嘢。所以我又即刻變咗又好珍惜，又覺得感謝佢哋。

（妳現在快樂嗎？）
我都有好打擊、好恐懼同埋好想退縮嘅時候㗎。因為呢好似呢：「哇，好亂啊好亂啊，成個人都亂曬龍啦」，有好多聲音都好亂噉樣㗎。但係因為我嘅夢想嘅聲音大啲吖嘛，我真係好想做一個好嘅 performing artist 吖嘛呢一刻，噉所以我都會繼續做好要做嘅嘢嘅。而我好 believe 你用心去做嘅嘢，人哋就用心去感受。（我們愛妳。）呢個我係到今天，無論幾多幾少掌聲，我都唔會 shake 呢個 believe 嘅。