Inglan Is a Bitch

W'en mi jus' come to Landan toun
Mi use to work pan di andahgroun
But workin' pan di andahgroun
Y'u don't get fi know your way around

Inglan is a bitch
Dere's no escapin it
Inglan is a bitch
Dere's no runnin' whey fram it

Mi get a lickle jab in a bih 'otell
An' awftah a while, mi woz doin' quite well
Dem staat mi aaf as a dish-washah
But w'en mi tek a stack, mi noh tun clack-watchah

Inglan is a bitch
Dere's no escapin it
Inglan is a bitch
No baddah try fi hide fram it

W'en dem gi' you di lickle wage packit
Fus dem rab it wid dem big tax rackit
Y'u haffi struggle fi mek en's meet
An' w'en y'u goh a y'u bed y'u jus' can't sleep

Inglan is a bitch
Dere's no escapin it
Inglan is a bitch
A noh lie mi a tell, a true

Mi use to work dig ditch w'en it cowl noh bitch
Mi did strang like a mule, but bwoy, mi did fool
Den awftah a while mi jus' stap dhu ovahtime
Den awftah a while mi jus' phu dung mi tool

Inglan is a bitch
Dere's no escapin it
Inglan is a bitch
Y'u haffi know how fi survive in it

Well mi dhu day wok an' mi dhu nite wok
Mi dhu clean wok an' mi dhu dutty wok
Dem seh dat black man is very lazy
But if y'u si how mi wok y'u woulda sey mi crazy

Inglan is a bitch
Dere's no escapin it
Inglan is a bitch
Y'u bettah face up to it

Dem a have a lickle facktri up inna Brackly
Inna disya facktri all dem dhu is pack crackry
Fi di laas fifteen years dem get mi laybah
Now awftah fifteen years mi fall out a fayvah

Inglan is a bitch
Dere's no escapin it
Inglan is a bitch
Dere's no runnin' whey fram it

Mi know dem have work, work in abundant
Yet still, dem mek mi redundant
Now, at fifty-five mi gettin' quite ol'
Yet still, dem sen' mi fi goh draw dole

Inglan is a bitch
Dere's no escapin it
Inglan is a bitch
Is whey wi a goh dhu 'bout it?