Ês Anu Raboitas Ka Di Fiansa

Panela sta nborkadu
Pôdôgó ká teni pitróli
Nôs kankaram dja ká skangadja
Koltxon di padja dja stendedo na mei di kasa
Nha genti forti é duedu
Kama'l txon ka tem otru'l modi
Ê dêta di trás labanta di dianti
Sinon galinha ta nbosta
Nhas tanboru dja ka teni midju
Nha garafon dja ka teni mel
Nha xintidu própi dja konta-m
Ma ês anu raboitas ka di fiansa
Kel katxupa sem goidura sen pintu
Bora kafé dja ka teni más goma
Nen sukri'l terra pa ndoxa
Nen dôs kudjer di leti pa korta kafé
Dentu funku dôs boronseti
Trás di kasa un txubara motxa
Ki ata pidi só bodeku ku sêfexu'l padja
Ma leti nen pa ramédi
Mosinhus dexa-m xinta pa-m sumara
Pamodi saku baziu ka ta sakedu
Dexa-m ozerba nhôs dexa-m kuda mundu
Pamodi dja-m pasa mal tamanhu