Erin-Go-Bragh

[Verse 1]
Ma name's Duncan Campbell fae the shire o Argyll
A've traivellt this country for mony's the mile
A've traivellt thro Irelan, Scotlan an aa
An the name A go under's bauld Erin-go-Bragh

[Verse 2]
Ae nicht in Auld Reekie A walked doun the street
Whan a saucy big polis A chanced for tae meet
He glowert in ma face an he gied me some jaw
Sayin whan cam ye owre, bauld Erin-go-Bragh?

[Verse 3]
Well, A am not a Pat tho in Irelan A've been
Nor am A a Paddy tho Irelan A've seen
But were A a Paddy, that's nothin at aa
For thair's mony's a bauld hero in Erin-go-Bragh

[Verse 4]
Well A know ye're a Pat by the cut o yer hair
Bit ye aa turn tae Scotsmen as sune as ye're here
Ye left yer ain countrie for brakin the law
An we're seizin aa stragglers fae Erin-go-Bragh

[Verse 5]
An were A a Pat an ye knew it wis true
Or wis A the devil, then whit's that tae you?
Were it no for the stick that ye haud in yer paw
A'd show ye a game played in Erin-go-Bragh

[Verse 6]
An a lump o blackthorn that A held in ma fist
Aroun his big bodie A made it tae twist
An the blude fae his napper A quickly did draw
An paid him stock-an-interest for Erin-go-Bragh

[Verse 7]
Bit the people cam roun like a flock o wild geese
Sayin catch that daft rascal he's killt the police
An for every freen A had A'm shair he had twa
It wis terrible hard times for Erin-go-Bragh

[Verse 8]
Bit A cam tae a wee boat that sails in the Forth
An A packed up ma gear an A steered for the North
Fareweill tae Auld Reekie, yer polis an aa
An the devil gang wi ye says Erin-go-Bragh

[Verse 9]
Sae come aa ye young people, whairever ye're from
A don't give a damn tae whit place ye belang
A come fae Argyll in the Heilans sae braw
Bit A ne'er took it ill bein caad Erin-go-Bragh