El Ghel Meni Hareko - الغل مني هاريكو

الغل مني هاريكو بس الهزار مداريكو
بصحى وبنام وسطيكو مخنوق ومحروق دمي
ده اللقمه لو على غش انا مش هاكل معلش
عاملوني بيه ١٠٠ وش وازاي معاكو هسمي

مستنين وقعتي ازاي وانا بصحتي
سكتكو غير سكتي مش ماسك الا يمين
انا ابيض ابن حلال ومليش ف قولنا وقال
السمعه عال العال وانا ضهري رب معين

مظبوط مع المظبوط من اجل راجل اموت
علشان اكون محطوط في حديد ودوامات
شبعان على الطبليه وبقدر الاخويه
مش مبدأ الماديه طيرت ياما آلوفات

لو ع الفلوس سداد بصرف ف اي ميعاد
انا لو عملت مزاد ما في حد هيشتريكم
على كتفي كنت شايلكو وانتو الجنيه محولكو
مبقاش واكل تمثيلكو رب العباد يهديكو

كلمه يا اخويا انسوها انتو اللي حزبتوها
اللقمه لو صونتوها انا كنت هبقى عليكو
انتو الجدع وياكم مش جايه سكه معاكو
بند الاصول عداكو النقص طبع ده فيكو

ع المولى كنت سايبها ولا عمري كنت حاسبها
خدت الصحاب على عيبها على مبدأ اننا واحد
اخرتها عضو ايديا جابو اللي فيهم فيا
بصيت لنفسي شويه مانا وسط عالم جاحد

ماشي بعلاج معلش بضحك لكن ع غش
الحزن مالي الوش في عينيا بحر دموع
علشانكو شوفت مرار خليتوا ليلنا نهار
منكم بقيت محتار انا قلبي بقى موجوع

من زعلي جسمي منمل ازاي معاكو هكمل
ده من زمان بتحمل جضيت خلاص بامانه
ضيعت نفسي عشانكم كان لازم ابعد عنكم
مبقتش شايف منكم غير تغفيلات وخيانه

مبقتش بفتح شاتكو لاغي الظهور لحالاتكو
صدعت من حكايتكو والعين بقت مش شايفه
ارقامكو على تليفوني موجود لو احتاجتوني
القلب الابيض لوني والدنيا كلها عارفه

عربيتي متفيمه والسكه متعتمه
اختارت اشوف العمى ومشوفش ناس اندال
لو الف باب مسدود رب العباد موجود
هعمل معاكو حدود ما الكل عبى وشال