E vui durmiti ancora

Lu suli è già spuntatu intra a lu mari
E vui, bidduzza mia, durmiti ancora
L'aceddi sunnu stanchi di cantari
E affriddateddi aspettanu ccà fora
Supra 'ssu barcuneddu su pusati
E aspettanu quann'è ca v'affacciati

Lassati stari, non durmiti cchiui
Ca 'nzemi a iddi, dintra sta vanedda
Ci sugnu puru iù, c'aspettu a vui
Ppi viriri 'ssa facci accussì bedda
Passu cca fora tutti li nuttati
E aspettu suru quannu v'affacciati

Li ciuri senza vui non vonnu stari
Su tutti ccu li testi a pinnuluni
Ognun d'iddi non voli sbucciari
Si prima non si rapì ssu barcuni
Intra li buttuneddi su ammucchiati
E aspettanu quann'è ca v'affacciati

Lassati stari, non durmiti cchiui
Ca 'menzu a iddi, dintra sta vanedda
Ci sugnu puru iù, c'aspettu a vui
Ppi viriri 'ssa facci accussì bedda
Passu cca fora tutti li nuttati
E aspettu suru quannu v'affacciati