De Fortuna

O Fortuna potens, ac nimis levis
Tantum juris atrox quae tibi vindicas
Evertisque bonos, erigis improbos
Nec servare potes muneribus fidem!

Fortuna immeritos auget honoribus
Fortuna innocuos cladibus afficit;
Justos illa viros pauperie gravat
Indignos eadem divitiis beat

Haec aufert juvenes et retinet senes
Injusto arbitrio tempora dividens
Quod dignis adimit transit ad impios
Nec discrimen habet rectave judicat
Incostans, fragilis, perfida, lubrica!

Nec quos clarificat perpetuo fovet
Nec quos deseruit perpetuo premit