Canson Da Cheullia

L'é pasòu za tànti ànni
De quànd'êa ancón pivèllo
Quéllo ténpo coscì bèllo
Chi mâi ciû sò-u peu scordâ

Quàndi-andâva into caróggio
A demoâme co-i gardétti
Êmo di mascarsonétti
Che asetæ no poéivan stâ

Me ne andâva alôa a schêua
Ma-e ciù vòtte me-a fugîva
E formâva a comitîva
Se n'andâvimo a bagnâ

In sci màcchi a-o Pàsso Nêuo
A Sàn Pê lazù da-a Fôxe
Òua cànto sótto vôxe
Quést'antîga mæ cansón

Chéulia dónde t'ê?
Me ricòrdo a mæ cazétta
De quànd'êa anco-ìn figeu
Chéulia dónde t'ê?
T'ê o ricòrdo mæ ciù câo
Che ascordâse no se peu
Chéulia dónde t'ê?
Coî patæli, quàttro stràsse
E a fasciêua pe-o figeu
Mi daiéiva a mæ fortùnn-a
Pe rivédde i mæ caróggi
E mæ stràsse, i mæ strofóggi
Che me stâvan tànto a-o cheu

Fæto pöi 'n pö ciù grànde
Me n'andâva a l'Acasêua
Co-i figeu zugâmo a l'êua
Co-e figétte da mæ etæ

Asetæ in scî scæn de pòrte
Se demoâvimo a-e bædìnn-e
E che e ziàrdoe fûsan mìnn-e
S'occupâmo con piaxéi

A-i mæ ténpi quàndi-a pòrta
A s'arvîva co-o spaghétto
E a-a séia fîto in létto
Ne metéivan a dormî

Cöse són quéste palànche
Cöse sèrvan a 'n vegétto
Se a seu casa meschinétto
Fòrse o no vediâ mâi ciù

Chéulia dónde t'ê?
Me ricòrdo a mæ cazétta
De quànd'êa anco-ìn figeu
Chéulia dónde t'ê?
T'ê o ricòrdo mæ ciù câo
Che ascordâse no se peu
Chéulia dónde t'ê?
Coî patæli, quàttro stràsse
E a fasciêua pe-o figeu
Mi daiéiva a mæ fortùnn-a
Pe rivédde i mæ caróggi
E mæ stràsse, i mæ strofóggi
Che me stâvan tànto a-o cheu