Ras bnadem راس بنادم
Noura * Track #1 On Ras Bnadem
Ras bnadem راس بنادم Annotated
جيت نسالك و أنتايا ترد جوابي --- حشّمتك بالله عليك كلّمني
هذا وطنك و لّا جيت برّاني --- ها ظريف المحنة لله كلّمني
يا ذا الرّاس الباقي في بلاد القفرة --- ندعيك للجوّاد الخالق القيّوم
الباعث الواحد الخالق لا يُرى --- ما دام الدّهر و الأيام ليك تدوم
يزرع فيك الروح وعيد لي كيف جرى --- حدّثني باللي جازوا عليك هموم
الله سوّاك و سوّى خلايق أخرى --- حرّ أنت ولا مملوك حرطاني
و الّا أنت منسوب لبيت أهل السنة --- قلبك طامع بالتحرير متهني
هذا وطنك و الّا جيت برّاني --- ها ظريف المحنة لله جاوبني
و الّا أنت خاين قبضوا عليك اخيانة --- باعوك بقيمة ربعين سلطاني
و الّا أنت مسلم من أصحاب أهل الجنة --- و الّا ظالم من الظُّلام نصراني
و الّا أنت شاعر امعاك أهل القانة --- زاهي في جلسات تفسير و امعاني
طبلك يرعد و خَوْدَاتْ في قَضَّانَة --- و أنت متمولك خاطرك هاني
يا ذا الرّاس الفاني اغريبتك صهدتنا --- يهديك لله كي ما صار خبّرني
هذا وطنك و الّا جيت برّاني --- ها ظريف المحنة لله جاوبني
و الّا انتايا غوث ارماتك ديوانة --- ساجد راكع عزّك سر رباني
تعبد في مولاك و قايم ديانة --- طاعوط الارواح الفارس و الجاني
لعبت بيك النفس و جاي في لجحانة --- و الّا من صغرك متابع الفاني
يهديك الله يا ذا الراس عيد علينا --- لان توقف في نومي اتشاهدك عيني
غربي و الّا شرقي ها ظريف المحنة --- و الّا قبلي جيت مسافر لوطني
و الا مول ليالي و راد لك مولانا --- اصبر للي قضا كي فراق سلطاني
هذا وطنك و الّا جيت برّاني --- ها راس المحنة لله جاوبني
ندعيك المولى الفرقان بن أمينة --- للّي خلقك يا ذا الراس و خلقني
أنت جافي من لبعاد مالك قمنة --- و الّا قاتل روح على أهلك جاني
و الّا انتايا يتيم و لا جبرت مْحَنَّة --- من طولة المحنة جنيت بلعاني
قُلت انت مانصبرشي لهذا الهانة --- نمشي في ملك الله وين والاني
الرّزق مع الرّوح انتاج حتى نفنى --- حتى يوصل وعد الله يدّيني
هذا وطنك و الّا جيت برّاني --- ها ظريف المحنة لله جاوبني
و الّا أنتايا سارق في ليالي ظلمة --- قتلوك الخيّان لي مشاو معاك
و الّا انت زجّار حدايدك مسمومـة--- ما تذبح في الجلبة غير ما يرضاك
و الّا انت نجّار تقايس الي سقمة--- ما تقطع في الغابة غير ما واتاك
و الّا انت عطّار حوايجك ملمومة --- مرجان و حنّة و روايح و مسواك
و الّا انت صياد راك مولى حكمة --- جلبك شي تقليد بقى المال وراك
و الّا انت خرّاز درّاز مول مرمّة --- إذا غشّيتْ الإسلام يا ما جاك
و الّا انت حدّاد مصانعي للخدمة --- تخدم بالهمّة ما بين ذاك وذاك
هذا وطنك و الّا جيت برّاني --- ها ظريف المحنة لله كلّمني
يا ذا الرّاس الفاني كانك راس امراة --- بعد الهمّة و الظّفرة مسيت عظام
لا كانت مولاتك شابّة كي القمرة --- في نجوع و دشرة تتعاشي على الاريام
ما مشطتكشي في الصوم شاو صغيرة --- ماهزتكشي هَجرة وريح غـرام
ما دخلتشي بيك اعراس كما نرى --- ما شدّتكشي بعمايــم التّبـــرام
ما ركبت هَوْدَجْ يطوال في قَضَّانَة --- ما ساقت جَحْفَة بَمْسُوكْ و حْنَــاني
هذا وطنك و الّا جيت برّاني --- ها ظريف المحنة لله جاوبني
ما لحقتشي قُوم اوراها تدّانـا --- تَنْدَهْ في فرسان اللُّوم وتعانــي
فارس متقحطر من هيه و لوخر منا --- ذوك الرجال اللوم اطرادهم مبني
أهل سروج القطيفة و عدّة زينا --- يخرجو في يـوم الحيف عينانــي
أهل اكحيل يوصلو لعدو بخشانة --- من عقد منوّر ما فيـه طرفانــي
فرض الموت عليك و لا بدّ من الفنا --- كيما صرت انت نلحقوا حنا تاني
هذا وطنك و الّا جيت برّاني --- يا راس الهانة لله جاوبني
و الّا انتايا يهودي خارج من المضرّة --- لا يوريني وصفك راك درت العار
و الّا انت مجاهد في بلاد الكفرة --- على وجه رسول الله من الأخيار
شوف لقصرك شوف قدّاش من حورية --- ما تدّي منهم لكان ما تختار
ما زاخوا ما فخروا كي بنات الدُّنيا --- اتخلقوا من كون الجنة بلا تفخــار
سهم العامل و الفلّاح و الصّوفية --- يحرم ربّي منهم غير لي فُجَّار
و الّا انت عالم فاهم الشرعيّة --- تعرف حـقّ الله ولا تديـر العار
هذا وطنك و الّا جيت برّاني --- ها ظريف المحنة لله جاوبني
جيتك بالله تعيدلي هذ المحنة --- انطقلي بصواب حْسِين حدّثني
جاوبني هو بحديث زين القَمْنَة --- كيما صاير بيه الصحيح خبّرني
جدّي من مصر متربّي في قسنطينة --- يتسمّى سيد المختار بن هنّـي
يمّا من جبال زواوة سمها يمنى --- بوها من لشراف على أصلو حُسني
و انا اسمي الهاشمي بن نونة --- مولى حكمة ناس كثيـر تعرفني
هذا وطنك و الّا جيت برّاني --- ها ظريف المحنة لله جاوبني
جيتك بالله تعيدلي هذ المحنة --- انطقلي بصواب حْسِين حدّثني
جاوبني هو بحديث زين القَمْنَة --- كيما صاير بيه الصحيح خبّرني
جدّي من مصر متربّي في قسنطينة --- يتسمّى سيد المختار بن هنّـي
يمّا من جبال زواوة سمها يمنى --- بوها من لشراف على أصلو حُسني
و انا اسمي الهاشمي بن نونة --- مولى حكمة ناس كثيـر تعرفني
هذا وطنك و الّا جيت برّاني --- ها ظريف المحنة لله جاوبني