Mawloud Sanat 80 - مولود سنة ٨٠

تتفك اللعبة مني
وأرجع أصلحها تاني
عمري ما بصيت لسنّي
ده أنا لسه ما جاش أواني
وألاقي المعادلة.. صعبة وسهلة
ف تقفل وتفتح.. من الناحيتين
وأمشي وأجري.. وأتعب واهدّي
وأبص لساعتي.. تقول انت مين
مولود سنة تمانين..
وبتعدي السنين..
قالوا لي خلاص كبرت..
أنا قولت إزاي وفين؟

وغامرت بعمري كله
ووقعت كتير وقومت
خدني الزحام في رجله
وسحبني الموج وعومت
يحيرني عقلي..ويغلبني قلبي
واما أحب أشكي أحكي لمين؟
باحارب في وحشي.. وباهزم في يأسي
وباكبر وباصغر.. وبالعب دورين
عديت بحاجات تشيّب
ومشاهد عايشة فيا
وفضلت بريء وطيب
حياتي دي مسرحية
ودوري بطولة..ولد م الطفولة
يغالب في خوفه.. يوفّي بدين
عيوني بتلمع.. ولا عمري هرجع
وكله هيسمع.. أنا ابقى مين!