Oilì, oilà!

Carmè, quanno te veco
Mme sbatte 'o core
Dimmello tu ch’è chesto
Si nun è ammore?

Chest'è ammore!
Oilì, oilà!
E dincello a mamma toja
Si te vò fà mmaretà

Carmè, dincello
'Nu bellu maretiello
È sempe buono!
Si no tu rieste sola
Sola, sola, e llariulà!
’A verità, nce vò 'na cumpagnia!

Comm'acqua a la funtana
Ca nun se secca
Ll'ammore è 'na catena
Ca nun se spezza

Nun se spezza
Oilì oilà!
Si se spezza, bonasera
Nun se pò cchiù 'ncatenà

Carmè, tu 'o ssiente?
'Nu bellu maretiello
È sempe buono!
Si no tu rieste sola
Sola, sola, e llariulà!
’A verità, nce vò ’na cumpagnia!

'Stu core aggio perduto
’Mmiez'a 'na via
Tu certo ll'haje truvato
Bellezza mia

Ll’haje truvato
Oilì, oilà!
Ll'haje truvato e ll'annascunne
Ma vengh'io pe' mm' 'o piglià

Carmè, dancillo!
'Nu bellu maretiello
È sempe buono!
Si no tu rieste sola
Sola, sola, e llariulà!
'A verità, nce vò 'na cumpagnia!