Guappo? No!

Guappo? No! Nun songo guappo
Ma si stongo fatto a vino
Quacche sera ca t'acchiappo
Faccio overo 'o malandrino

E te dico: "Ccà stongh'i'
Si pe' 'st'uocchie aggi' 'a murì
Si pe' tte mm'aggi' 'a dannà
Figlia mia, t' 'o ppuò scurdà

Io sò giovane e sò forte
E mm'appicceco cu 'a morte
Pe' campà"

Tu sì bella e nun mme siente
Io sò brutto e pe' fà 'o bello
Mme 'mbriaco e, si mme tiente
T'accarezzo cu 'o curtiello

E po' dico: "Ccà stongh'i'
Si pe' 'st'uocchie aggi' 'a murì
Si pe' tte mm'aggi' 'a dannà
Figlia mia, t' 'o ppuò scurdà

Io t'accido e nun mme 'mporta
Ca te voglio pure morta
'Mbracci'a mme"

Guappo? No! Nun songo guappo
E nun stongo fatto a vino
Cchiù te tremmo e mme ne scappo
Cchiù te sento e mm'avvicino

E te dico: "Stongo ccà
Si pe' tte mm'aggi' 'a dannà
Si pe' 'st'uocchie aggi' 'a murì
Io sò pronto a dì ca sì

'Nnanz'a te nun faccio 'o forte
E si vuò, mm'abbraccio 'a morte
Pe' murì"