Kleviol Ahmetaj (Lushnjë, 4 Mars 1986), ose ndryshe i njohur me emrin artistik Cllevio Masoni, është një rreper dhe ish-trafikues i lëndëve narkotike nga Shqipëria.

Që i ri, ai punonte për projekte muzikore të zhanrit rap. Gjatë rinisë, ai jeton në New York për 11 vite, ku bëhet pjesë e rrethit të Unikkatil, TBA. Në 2008, vjen në skenë me bashkëpunimin “Jaran”.

Në vitin 2014, së bashku me 6 persona të tjerë dënohet nga Gjykata e Krimeve të Rënda për trafik të lëndëve narkotike. Ahmetaj akuzohej për paketimin e kanabisit i cili u gjend pas përplasjes së avionit transportues në Divjakë. Pas kryerjes së dënimit 6-vjeçar, në vitin 2020 rikthehet në skenën e muzikës dhe vazhdon me projekte muzikore. Telashet ligjore e ndjekin atë, duke përfshirë akuza të armëmbajtjes pa leje.

Jeta e tij dhe krimi përbejnë tema kryesore në veprat e Cllevios, ku lirisht pranon fajsinë dhe tregon historinë e tij. Kjo muzikë e sinqertë në tekst, përzier me personalitetin e tij interesant dhe prezencën në media sociale, e kanë bërë Cllevion një ndër artistët më të dëgjuar momentalisht.