La palummella

Palummella, zompa e vola
Addó' sta nennélla mia...
Non fermarte pe' la via
Vola, zompa a chella llá...

Co' li scelle
La saluta...
Falle festa
Falle festa
Attuorno attuorno...
E ll'hê 'a dí
Ca, notte e ghiuorno
Io stó' sempe
Io stó' sempe
A sospirá...

Palummella, vola vola
A la rosa de 'sto core...
Non ce sta cchiù bello sciore
Che t'avesse da piacé...

'A ll'addore
Ca tu siente...
'a chill'uocchie
'a chill'uocchie
'a chillo riso...
Credarraje
Ca, 'mparaviso
Tu si' ghiuta...
Tu si' ghiuta...
Oje palummé'!

A lu labbro curallino
Palummé' va' zompa e vola...
'ncopp'a chillo te cunzola
E maje cchiù non te partí!...

Ma si vide
Ca s'addorme...
E te vène
E te vène
Lo tantillo...
Tu ll'azzecca
No vasillo...
E pe' me
E pe' me
N'auto porzí!